البداية

بدأت حكايتى لما حسيت بيد جدتى العزيزة تنغز ما تصل اليه من جسدى ووصل الى مسامعى صوتها الجميل تقول لى
-اصحى يا احمد ابوك على التليفون
-حاضر جاى وراكى على طول
قمت من نومى مترنحا ومشيت الى التليفون وفى الطريق القيت السلام على خالى الجالس بجوار الشباك يمارس هوايته الاولى فى حرق السجاير
امسكت سماعة التليفون وادرت عجلة الحوار
-الو ايوة يا بابا
-ازيك يا احمد
-كويس الحمد لله ازيك انت وازاى اللى عندك؟
-كلهم كويسين النتيتجة بانت
-وجبت كام -252
-والثانوية العامة بتاخد من كام؟
-190
-طيب كده تمام اوى
-ماشى انا هبقى اكلمك علشان تيجى تقدم
-ماشى يا بابا مع السلامة
وضعت السماعة وتنفست الصعداء
يا سلام نجحنا فى الاعدادية دى كانت سنة ما يعلم بيها الا ربنا
الحمد لله غارت فى داهية
سألتنى جدتى
ها عملت ايه؟؟
الحمد لله نجحت
طيب الحمد لله مبروك
نادانى خالى قائلا
-احمد
-ايوة يا خالو
-النتيجة بانت
-ايوة ونجحت يا خالو
-ليه هو انت ما كنتش عايز تنجح جبت كام ؟
-252
-يعنى داخل ثانوية عامة
-ايوة
-شاطر يا احمد
وهديتك عندى
والهدية اللى كانت العين عليها هى موبابل كان عبارة عن تعويض مقدم لنا سالاقيه من بؤس وشقاء فى اغبر 3 سنين شفتهم

رجعت الى سريرى الحبيب واحتضنت وسادتى وغبت فى نوم عميق
عدت الايام سريعا كعادتها حينما اقضيها فى القاهرة وعدت الى طنطا وجاء ميعاد التقديم للمدرسة الجديدة
والمدرسة اللى كان عليها العين هى مدرسة نواج الثانوية المشتركة
اما عن سبب اختيار هذه المدرسة بالذات دونا عن باقى مدارس طنطا
هو ان هذه المدرسة مدرسه مهلبية والحضور زى الغعياب يعنى مش هنحضر وكمان المدرسة دى مشتركة يعنى فيها بنات ومع البنات هيبقى فيه حكايات يعنى الدنيا هتبقى بمبى فى بمبى
اما نواج دى فهى بلد جنب طنطا
ولما سالت عن سبب تسميتها بهذا الاسم قالو لى ان كان فيه فيضان او سيول حاجة زى كده وغرق الناس
اما الناجيين فوصلوا للبلد دى وسموها نواج من النجاة.
كان ابى قد تجهز للرحلة الموعودة فقد سحب الملف بتاعى من المدرسة الاعدادية
(نفسى اعرف ايه اخرة الملف ده)
وتجهزنا للذهاب الى مدرسة نواج الثانوية المشتركة
والمرة الجاية احكى لكم عن نواج شوية حكاوى كده عرفتها قبل ما ادخل المدرسة هناك
ونكمل المرة اللى جاية
احمد